Stgalims da qualitad da l’autentificaziun en AGOV (agov.ch/agovaq)
Stoss jau m’occupar da quest tema sco utilisadra u utilisader final dad AGOV?
Na. Per reglar Voss affars administrativs digitals na stuais Vus betg enconuscher ils differents stgalims da qualitad da l’autentificaziun. Sche l’applicaziun d’ina autoritad pretenda ina verificaziun supplementara, As maina AGOV automaticamain tras ils pass necessaris. Vus confermais per exempel Vossa adressa postala u cumprovais Vossa identitad. Quest artitgel sa drizza a persunas che s’interessan per ils fundaments tecnics.
Tge signifitga qualitad da l’autentificaziun?
La qualitad da l’autentificaziun descriva la fidabladad d’ina procedura da login. Ella dependa da la segirtad dal med utilisà e da la fidabladad cun la quala quel po vegnir attribuì al conto correct u ad ina persuna cun identitad verifitgada. Trais caracteristicas èn centralas:
- Il factur da login utilisà. AGOV utilisescha l’app AGOV access, clavs da segirtad FIDO e l’e-ID svizra. Quests meds da login èn protegids cun metodas criptograficas; lur caracteristicas da segirtad cumpiglian la protecziun cunter falsificaziun, interceptaziun ed utilisaziun tras terzas persunas senza il consentiment da la titulara u dal titular.
- La fidabladad da l’attribuziun. Il factur da login sto esser attribuì al conto AGOV correct. Sch’ina verificaziun da l’identitad è vegnida fatga, sto ses resultat esser collià en moda fidabla cun quest conto e cun la persuna verifitgada.
- La fidabladad da la verificaziun da l’identitad. Decisiv è, sche las datas persunalas èn mo vegnidas decleradas da la persuna sezza u verifitgadas sin basa d’ina cumprova d’identitad. Latiers tutgan la controlla dal document d’identitad ed il cumparegl da la persuna cun la fotografia sin il document. Tar la verificaziun online vegn supplementarmain controllà, sch’i sa tracta d’ina persuna viva (controlla da liveness). L’e-ID svizra vegn recumandada sco emprima tscherna per cumprovar l’identitad.
AGOV pretenda sin tut ils stgalims da qualitad facturs da login ferms* e lur attribuziun segirada**. Las differenzas pertutgan pia mo il punct 3, la verificaziun da l’identitad.
* Tut ils facturs da login dad AGOV èn protegids cun metodas criptograficas ad in nivel da segirtad tecnica aut e cumparegliabel.
** Ils facturs da login vegnan utilisads activamain durant la registraziun dal conto, la verificaziun da l’identitad ed ils logins. Uschia vegn mantegnida la colliaziun tecnica cun il conto AGOV respectiv; la verificaziun da l’identitad stabilisescha supplementarmain la colliaziun cun la persuna verifitgada.
Pertge datti en AGOV plirs stgalims da qualitad da l’autentificaziun?
Per tscherts affars administrativs digitals sto l’autoritad savair en moda fidabla tgi che Vus essas. En quests cas è necessaria ina verificaziun da l’identitad. En auters cas basti da confermar che Vus essas cuntanschibla u cuntanschibel ad ina tscherta adressa postala, u schizunt da disponer d’in conto AGOV senza ulteriuras verificaziuns. L’autoritad cumpetenta fixescha il stgalim necessari sin basa dal dretg applitgabel sco er dal process d’affars e da sias ristgas. Las verificaziuns gidan ad impedir access nunautorisads ed affars administrativs sut in’identitad faussa u simulada.
Tge stgalims da qualitad da l’autentificaziun datti en AGOV?
Tar il scleriment da l’identitad datti trais categorias fundamentalas: contos AGOV cun datas persunalas betg verifitgadas, contos cun ina adressa postala confermada e contos cun identitad verifitgada. Entaifer l’ultima gruppa distingua la scala tecnica AGOVaq supplementarmain la preschientscha d’in numer AVS svizzer validà e l’utilisaziun directa da l’e-ID durant il login.
La directiva informatica da la Confederaziun «I050 – Fidabladad da las confermas d’identitad» (tudestg) definescha ils criteris per valitar confermas electronicas d’identitad per applicaziuns da l’administraziun federala. Ella distingua quatter stgalims da confidenza (Level of Assurance, LoA) e resguarda tant la registraziun sco er l’utilisaziun posteriura durant il login. AGOVaq metta en pratica questa directiva per AGOV: las pretensiuns vegnan concretisadas per las proceduras specificas da registraziun e da login dad AGOV.
La colonna I050 classifitgescha las proceduras descrittas tenor ils criteris tecnics. Decisiv è il stgalim pli bass tranter la registraziun e l’utilisaziun. Tut ils criteris dal stgalim respectiv ston esser ademplids; la renconuschientscha formala sa drizza tenor il chapitel 3 da la directiva I050.
- * AGOVaq 400 signifitga ch’in numer AVS svizzer validà è avant maun supplementarmain.
- ** AGOVaq 500 signifitga che l’e-ID svizra vegn preschentada directamain durant il login respectiv.
- *** Tut tenor il cas d’utilisaziun ed il dretg applitgabel vegnan ils custs mess a quint a las utilisadras ed als utilisaders finals (pajament online en AGOV) u a las autoritads (quint collectiv). Ils pretschs inditgads en la tabella valan a partir dal 01.01.2027. Per las metodas da verificaziun da l’identitad che permettan a las utilisadras ed als utilisaders finals da pajar sezs, èn inditgads ils pretschs online per utilisadras ed utilisaders finals, inclusiv la taglia sin la plivalur; per las autras metodas èn inditgads ils pretschs da verrechnaziun interns. Divergenzas en il quint collectiv, sco supplements da facturaziun, vegnan regladas en la cunvegna tranter l’emittent ed il destinatur dal quint.
Classificaziun tenor ils criteris da la directiva I050
**** AGOVaq 100 vegn numnà en il linguatg da mintgadi «LoA2», perquai ch’i vegn gia utilisada in’autentificaziun ferma cun dus facturs. Questa designaziun resguarda dentant mo l’autentificaziun. Tenor ils criteris da la directiva I050 limitescha l’identitad declerada da la persuna sezza la procedura d’identificaziun ad ID1 e pia il stgalim general a LoA1.
Tar AGOVaq 200 vegn la brev tramessa exclusivamain ad ina adressa tenor il register postal «Domicile Certified». Il cumparegl cun il register furma la funtauna fidada tenor VoA.b; l’endataziun dal code da la brev conferma la recepziun. Sin questa basa vegn fatga la classificaziun sco LoA2.
LoA3 pretenda almain ID3, IC3 ed IE3 per la procedura d’identificaziun, la consegna dal med d’autentificaziun e la surveglianza da l’emittent, sco er RC3 ed AM3 per l’autentificaziun e la robustezza. In numer AVS validà supplementar u la preschentaziun directa da l’e-ID na maina per sasez betg a LoA4.
Basa (tudestg): I050, versiun 1.2, cifras 2.2.1–2.2.3 e chapitel 3.