Blog
Contribuziuns da blog
Nov process da login per ils servetschs online dal chantun Basilea-Citad cun AGOV
Il chantun Basilea-Citad modernisescha ils process da registraziun e da login per ses servetschs online. En il rom da questa modernisaziun è vegnì integrà l' AGOV login da la confederaziun. → Communicaziun per las medias (tudestg)
Il chantun Lucerna lantscha my.lu.ch cun ina AGOV
Il nov chanal da communicaziun supplementar my.lu.ch stat a disposiziun a partir d'immediat per la populaziun e per las interpresas. → Communicaziun per las medias (tudestg)
Test d’accessibladad ad AGOV cun la Federaziun svizra da las persunas tschorvas
Las utilisadras ed ils utilisaders finals ch’èn tschorvs u che han in impediment da la vesida pon duvrar AGOV senza barrieras. La Chanzlia federala svizra ha laschà testar AGOV da la Federaziun svizra da las persunas tschorvas. Ina da las duas persunas da test era tschorva e l’autra aveva in impediment da la vesida. Omaduas persunas han pudì duvrar AGOV senza barrieras, q.v.d. ils cuntegns dad AGOV èn vegnids reproducids correctamain sin il screenreader e sin il display da Braille. Er l’access senza barrieras a l’app dad AGOV è garantì, damai ch’ils sistems operativs Android ed iOS èn vegnids optimads en quest reguard. La persuna da test tschorva ha constatà ch’il diever d’ina clav da segirezza fisica (stick USB FIDO) è per ella pli pratitgabel ch’il diever da l‘app dad AGOV. Cun l’app sto il code QR numnadamain vegnir scannà sin il monitur a bun gartetg (bleras persunas tschorvas che dovran l’internet, n’han nagin monitur resp. na tschentan betg en quel). AGOV cuntegna uss in avis correspundent ch'ils screenreaders legian avant en moda prominenta.
Il nov login administrativ vegn testà en dus chantuns da pilot
Il servetsch d’autentificaziun da las autoritads svizras (AGOV) ha cumenzà oz ses manaschi operativ en dus chantuns da pilot. Cun il login administrativ unitar vegn simplifitgà il traffic electronic cun las autoritads da la Confederaziun, dals chantuns e da las vischnancas. En ils chantuns Turitg ed Appenzell Dador po uschia il login dad AGOV per exempel vegnir duvrà per acceder en moda svelta e simpla a la decleraziun da taglia electronica. Er l’identitad electronica statala planisada (e-ID) vegn colliada cun il login dad AGOV. AGOV fa part da l’agenda Administraziun digitala Svizra (ADS).https://www.bj.admin.ch/bj/de/home/aktuell/mm.msg-id-99665.html
Controllas da segirezza en l'ambient productiv dad AGOV
Cun in program da bug bounty e cun in penetration testing vegni controllà, sch’i existan largias da segirezza tar AGOV. Ina procedura da login sto esser fitg segira. Ils aspects da segirezza pertutgan la software dad AGOV, la plattafurma operativa, incl. las bancas da datas, e la colliaziun cun la rait. Perquai èsi necessari da far tests da segirezza cumplessivs, il meglier directamain en il sistem productiv. La Chanzlia federala svizra ha incumbensà l’Uffizi federal da l'armament armasuisse da far in penetration testing. Ils spezialists d’armasuisse testeschan transacziuns betg autorisadas sin AGOV. Els disponan d’enconuschientschas detagliadas fin al code da funtauna. AGOV vegn er examinà tras in program da bug bounty che va sur l’Uffizi federal da la cybersegirezza. Per quest intent vegnan engaschads hackers etics che simuleschan attatgas, senza disponer d’ina savida detagliada. Ils hackers etics vegnan indemnisads per mintga punct debel ch’els annunzian (uschenumnads bounties). Ils puncts debels chattads che n’èn betg critics, vegnan eliminads entaifer paucs dis, quels critics entaifer in di.
AGOV Proof-of-concpet
Il public po testar in prototip semifuncziunal dad AGOV. Quel vegn mess a disposiziun per verifitgar l’acceptanza. L’acceptanza d’in product digital tar las gruppas d'interess, surtut tar ils utilisaders finals, è decisiva per ses success. La fidaivladad, la simpladad e l’estetica dal product digital procuran per ina gronda acceptanza. Per AGOV èn tut ils aspects vegnids optimads tenor il stadi da la tecnica. Avant ch’il prototip è vegnì surdà al public, è el vegnì testà cun ina pitschna gruppa da probands eterogena. Ils resultats èn stads positivs. Enfin la fin da l’onn pon ils chantuns ed autras partidas interessadas evaluar il prototip semifuncziunal. La squadra dad AGOV prenda encunter las pretensiuns e las realisescha tant pli svelt, sche pussaivel avant il go live il schaner dal 2024. Il prototip è semifuncziunal, perquai che las proceduras per verifitgar l’identitad BVI da la Posta Svizra e la verificaziun da video vegnan emuladas. Quai facilitescha considerablamain la repetiziun dals tests. In’applicaziun da test è colliada cun il prototip, uschia ch’in uschenumnà login target stat a disposiziun ed uschia che las autoritads svizras pon colliar lur sistems da target da test cun il prototip. Il prototip vegn preschentà a las autoritads svizras ils 17 d’avust 2023 en la Chasa dals chantuns en il rom da l’Administraziun digitala Svizra ADS. Igl è er pussaivel da participar a l’occurrenza via Microsoft Teams.