Factsheet
AGOV - Servetsch d’autentificaziun da las autoritads svizras
AGOV, definiziun
AGOV è il login da las autoritads svizras. El vegn duvrà da l’administraziun federala sco er da las autoritads chantunalas e communalas per tractar fatschentas administrativas en moda digitala. Terzas persunas, per exempel la Crusch Cotschna Svizra, pon utilisar AGOV per exequir il dretg federal tenor la lescha LMeCA.
AGOV, finamiras ed effect
- Reducziun da custs tar las autoritads, perquai che nagins sistems da login agen na ston vegnir mantegnids (l’explotaziun da tscherts sistems chantunals è gia vegnida terminada).
- Procedura da login unifitgada per tut las fatschentas administrativas digitalas da persunas natiralas en Svizra.
- Promoziun da la digitalisaziun, spezialmain er en il sectur da la sanadad: AGOV duai vegnir duvrà er per il (nov) dossier electronic dal pazient.
- Auta segirezza cibernetica per utilisadras ed utilisaders sco er per autoritads, perquai che vegnan duvrads mo facturs da login rinforzads (nagins pleds-clav e nagins codes SMS).
- AGOV vegn ad esser l’emprim grond champ d’applicaziun da l’e-ID: nua che ina verificaziun segira da l’identitad è necessaria (p.ex. per il dossier electronic dal pazient), pon utilisadras ed utilisaders s’identifitgar online cun l’e-ID tar l’emprima registraziun ad AGOV. Questa pussaivladad supplementara è previsa cun l’introducziun da l’e-ID ils 1. da december 2026.
AGOV en cifras
1,5 milliuns Svizras e Svizzers possedan in conto AGOV. L’onn 2025 èn vegnidas effectuadas 8 milliuns connexiuns via AGOV – cun ina ferma tendenza a crescher. Tut la cyberadministraziun da la Confederaziun e da l’armada sco er la cyberadministraziun da 14 chantuns èn colliadas ad AGOV. Ulteriurs chantuns èn en planisaziun. Tut ils 26 chantuns han mussà interess.
Stadi: mars 2026
Finanziaziun
Il svilup e l’introducziun d’AGOV custan circa 16 milliuns francs e vegnan finanziads per dus terzs da l’« Agenda ADS » (Administraziun digitala Svizra). Ils custs da manaschi d’AGOV muntan a circa 5 milliuns per onn e vegnan finanziads a parts egualas da la Confederaziun e dals chantuns participonts. La clav da repartiziun tranter ils singuls chantuns sa basa sin il dumber d’abitants.
Governanza
AGOV vegn manà da la Chanzlia federala sco servetsch standard. Ils departaments èn integrads tras il comitè directiv dals servetschs standard e ils chantuns participonts tras il AGOV Steering Committee.
Segirezza e resilienza
AGOV vegn controllà cuntinuadamain per vulnerabilitads en il rom d’in program public da bug bounty e vegn regularmain suttamess a tests da penetrazione tras armasuisse. A partir dal 2027 vegn il manaschi ad esser fitg disponibel e resilient, tant en ils centers da calculaziun da la Confederaziun sco er en centers da datas svizzers dal sectur privat.
Basas legalas
Las basas legalas centralas d’AGOV èn la lescha LMEIA, la lescha LFEID e l’ordinaziun OIAM; ellas reglan il champ d’applicaziun d’AGOV ed autoriseschan las tractaziuns da datas correspundentas.