Q: Tge sistem operativ dovra mes smartphone, per che jau possia installar l'app AGOV access?

Apparats mobils dad Apple cun sistems da manaschi iOS 12 u pli novs . Apparats mobils cun sistem da manaschi Android 6 ni pli novs .

Question 1

Nua poss jau utilisar il login dad AGOV?

Accepted Answer

Vus pudais duvrar il login dad AGOV en la correspundenza electronica cun tut las autoritads svizras che sa participeschan tar AGOV – tranter quellas ils chantuns, lur vischnancas, l' administraziun federala sco er terzas persunas cumpatiblas cun l' EMBAG (EMBAG: Lescha federala davart il diever da meds electronics per ademplir incumbensas uffizialas).

Question 2

Nua poss jau administrar mes login dad AGOV?

Accepted Answer

Vus pudais administrar Voss login dad AGOV sin www.agov.ch/me.

Question 3

Tge signifitga login «senza pled-clav»?

Accepted Answer

En las proceduras da login tradiziunalas vegnan duvrads il num d’utilisader e la clav d’access, eventualmain cumpletads cun in segund factur d’autentificaziun.

Cun AGOV, però, vegnan remplazzads il num d’utilisader e la clav d’access tradiziunals – inclus ils segunds facturs – tras applicaziuns specificas* sin il smartphone u tras clavs da segirezza (en il pled popular: «stick FIDO»). Quai è ina soluziun segira ed er fitg commoda per l’utilisaziun._{* App swiyu cun l’e-ID svizra e/u l’app AGOV access.}

Question 4

Nua vegnan arcunadas mias datas?

Accepted Answer

AGOV vegn manà da la Confederaziun en agens centers da datas en Svizra. Là èn arcunadas er Vossas datas.

Excepziuns:
Vossas clavs d’access (artefacts cryptografics) vegnan memorisadas en il chip da segirezza da Voss smartphone u en quel da Vossa clav da segirezza (FIDO2). Sche Vus accedais a Voss smartphone u a Vossa clav da segirezza via biometria, Vossas datas biometricas restan memorisadas exclusivamain sin l’apparat u sin la clav da segirezza e na vegnan betg transmessas ad AGOV.

Question 5

Pertge stoss jau installar l'app AGOV access e na poss jau betg simplamain duvrar l'app Authenticator da Microsoft u da Google?

Accepted Answer

L'app AGOV access è bler pli segira che per exempel l'app Authenticator da Google, perquai ch'ella memorisescha Voss code d'access (artefacts criptografics) sin il chip da segirezza da Voss smartphone. Questa tecnologia garantescha in stgalim da segirezza spezialmain aut, uschia che l'app AGOV access è ordvart resistenta envers attatgas da hackers. Er bancas lavuran cun questa furma segira da l'autentificaziun e porschan atgnas apps d'access.

La procedura cun apps d'access premetta che mintga instituziun mettia a disposiziun sia atgna app. L'app na po e na dastga numnadamain betg vegnir duvrada per plirs sistems en mira. L'app AGOV access è vegnida sviluppada spezialmain per la correspundenza electronica segira cun autoritads. L'app AGOV access pon ins chargiar giu gratuitamain da l'Apple App Store e dal Google Play Store. Cun main che 100 MB dovra ella fitg pauc spazi d'arcunaziun sin Voss smartphone.

Question 6

Pertge na funcziunan betg ils passkeys sincronisabels cun AGOV?

Accepted Answer

Passkeys èn ina metoda moderna e segira per s’annunziar senza pled-clav, nua che ina clav criptografica vegn memorisada sin il dispositiv da l’utilisader.

Per motivs da segirezza e regulaziuns, AGOV permetta dentant be clav criptograficas che vegnan memorisadas localmain en in chip da segirezza* - per exempel sin ina clav da segirezza FIDO2 u directamain sin il dispositiv.

Passkeys che vegnan sincronisadas tranter plirs apparats sur servetschs da cloud sco iCloud u Google vegnan consideradas sco main fidablas, perquai che ellas pon potenzialmain vegnir exportadas. Per garantir en mintga mument l’origin e l’integritad da las clavs, AGOV accepta be clavs colliadas cun il hardware, che na pon ni vegnir transferidas, ni exportadas, ni sincronisadas. L’app AGOV access e l’app swiyu per l’e-ID svizra adempleschan gia cumplettamain quests resquists._{* Cun «chip da segirezza» vegnan chapidas unitads da memorisaziun dedicadas e betg exportablas per clavs – sco ils Trusted Platform Modules (TPM), la Secure Enclave (Apple), il Titan M (Google) u ils moduls da segirezza en las clavs da segirezza FIDO2.}

Question 7

Tge sistem operativ dovra mes smartphone, per che jau possia installar l'app AGOV access?

Accepted Answer

Apparats mobils dad Apple cun sistems da manaschi iOS 12 u pli novs.

Apparats mobils cun sistem da manaschi Android 6 ni pli novs.

Question 8

Tge clavs da segirezza pon vegnir applitgadas tar AGOV?

Accepted Answer

Qua chattais Vus ina glista da las clavs da segirezza adattadas.

Question 9

Tgi po utilisar AGOV (caracteristicas da las persunas, aspects geografics e giuridics tecnics)?

Accepted Answer

Da princip stat AGOV a disposiziun a tut las persunas sin l'entir mund, independentamain da la vegliadetgna, da la maiorennitad, da la derivanza, dal lieu da dimora u d'autras caracteristicas persunalas. In conto AGOV represchenta adina ina persuna natirala che agescha u per sasezza u per insatgi auter (guardar latiers er la suandanta dumonda davart persunas giuridicas).En reguard giuridic tecnic vala il suandant:

Sch' i dat restricziuns da l' internet sin elements d' adressat da AGOV u sin applicaziuns da finamiras, p.ex. bloccadas dal stadi, na pon la AGOV e sias applicaziuns da finamiras betg vegnir utilisadas directamain sur las colliaziuns pertutgadas.
Sch'i n'è betg pussaivel da chargiar giu l'app AGOV access (p.ex. pervia da limitaziuns d'apparats u da pajais), èsi necessari da far diever da clavs da segirezza FIDO2.

La verificaziun, sch'ina tscherta persuna dastga far in'acziun (p.ex. areguard la vegliadetgna minimala, la maiorennitad u l'appartegnientscha ad in'organisaziun), è chaussa da las applicaziuns da destinaziun, betg dad AGOV. Er la decisiun, sche l'identitad sto esser vegnir verifitgada sur AGOV a maun d'in document d'identitad uffizial, è chaussa da l'applicaziun da destinaziun respectiva.Questas verificaziuns da l'identitad èn disponiblas sin plaun internaziunal (documents d'identitad acceptads tenor: glista da pajais). Sch'ina applicaziun da destinaziun pretenda stringentamain il numer AVS sur AGOV, sa restrenscha il circul d'utilisadras e d'utilisaders pussaivel a persunas cun in numer d'assicuranza sociala svizzer (NAVS13).

Question 10

Pon persunas giuridicas utilisar AGOV?

Accepted Answer

Per las persunas giuridicas ageschan persunas natiralas e questas pon duvrar logins dad AGOV. L'attribuziun da las persunas natiralas a las persunas giuridicas na vegn betg reproducida en AGOV, mabain è chaussa dals sistems en mira.

Question 11

Reflectescha AGOV ils dretgs d’access, affiliaziuns, substituziuns, relaziuns fiduziarias e chaussas sumegliantas?

Accepted Answer

Na. A mintga conto dad AGOV vegn attribuida precis ina persuna natirala en moda clera (dentant betg en moda clera en omaduas direcziuns). La proporziun da la relaziun en questa direcziun correspunda damai a quella dals documents da legitimaziun sco il passaport svizzer, la carta d’identitad svizra e la e-ID statala planisada.En la direcziun inversa vala dentant: Ina persuna natirala po disponer da plirs contos dad AGOV (mintgamai in per mintga adressa dad e-mail) e decider en moda autonoma, tge conto ch’ella vul duvrar en tge context.AGOV na reflectescha betg ils dretgs d’access, affiliaziuns, substituziuns, relaziuns fiduziarias e chaussas sumegliantas. Tut quai vegn administrà e controllà dals sistems en mira.AGOV na definescha damai betg, sche Vus agis sco persuna privata, per incumbensa d’ina organisaziun u en in’autra rolla - l’interpretaziun e l’examinaziun da la rolla concreta vegnan fatgas unicamain tras il sistem en mira.

Question 12

Èsi scumandà da dar mes login dad AGOV ad autras persunas?

Accepted Answer

Contos da login dad AGOV sa refereschan a persunas e represchentan adina exactamain ina persuna natirala, independentamain dal fatg, sche quella agescha via login dad AGOV per sasezza u per incumbensa, per exempel per ina corporaziun. La responsabladad per l'utilisaziun dal login dad AGOV confurm a l'urden, per las applicaziuns respectivas e per las transacziuns fatgas cun il conto ha questa persuna natirala. Quai signifitga che la persuna è er responsabla per il deposit segir e per l'utilisaziun adequata dals facturs da login respectivs (app AGOV access e/u clavs da segirezza). Sche questa persuna transmetta in login dad AGOV ad ina u a pliras persunas per l'utilisaziun, vegnan revelads u surdads ils facturs da login tras la persuna transmettenta (tras ina surdada fisica u tras la registraziun da clavs da segirezza u d'apps AGOV access che na stattan betg unicamain sut la controlla dals possessurs dal conto da login dad AGOV). I na dat nagina basa giuridica che scumonda questa procedura per AGOV. Resalvadas restan dentant disposiziuns areguard las applicaziuns da destinaziun respectivas ed areguard las transacziuns fatgas.

Sco resumaziun vala il princip tenor il video «7 tips impurtants». Voss login dad AGOV è persunal. N'al dai betg vinavant e na registrai betg telefonins u clavs da segirezza sco facturs da login AGOV, sche Vus n'avais betg la controlla exclusiva.

Question 13

È AGOV senza barrieras?

Accepted Answer

Er per AGOV vala l'obligaziun da concepir in access senza barrieras tenor las basas che figureschan qua sutvart*. Per cuntanscher l'access senza barrieras realiseschan ils sviluppaders dad AGOV las recumandaziuns da las Web Content Accessibility Guidelines (WCAG) e fan tests d'utilisaziun cun persunas che dovran tscherts aspects da l'access senza barrieras. Las utilisadras ed ils utilisaders dad AGOV pon annunziar a l'administraziun federala realisaziuns manglusas u suboptimalas da l'access senza barrieras ad AGOV (accessibility@agov.ch – questa adressa dad e-mail prenda encunter exclusivamain annunzias davart l'access senza barrieras, per in support èsi en mintga cas da consultar agov.ch/help). Cun utilisar AGOV vegn duvrada per gronda part l'app AGOV access (iOS u Android). Er questa app AGOV access è senza barrieras ed interagescha stretgamain cun ils mecanissems d'accessibladad dal sistem operativ dal telefonin. Per persunas tschorvas che utiliseschan AGOV poi esser in obstachel da stuair far in scan dal code QR dad AGOV, perquai che las persunas tschorvas dovran l'internet savens senza envidar il monitur. L'alternativa a l'app AGOV access èn las clavs da segirezza, lur cas d'utilisaziun vegn mussà cumplettamain sin il lectur dal visur ed en la lingia Braille.

*

_{L'artitgel 8 alinea 2 da la Constituziun federala pretenda che persunas cun in impediment corporal, spiertal u psichic na vegnian betg discriminadas.}
_{La Lescha davart l'egualitad da persunas cun impediments (Llmp) oblighescha da prender mesiras per impedir, per reducir u per eliminar dischavantatgs.}
_{L'Ordinaziun davart l'egualitad da persunas cun impediments (OImp) cuntegna disposiziuns concernent las pretensiuns da concepir ils servetschs da la Confederaziun tenor ils basegns da las persunas cun impediments.}
_{L'artitgel 9 da la Convenziun da l'ONU davart ils dretgs dals umans cun impediments (CRPD) explitgescha la garanzia d'in access cun ils medems dretgs ad infurmaziuns ed a servetschs per la publicitad.}
_{Dapi ils 28 da zercladur 2025 è plinavant en vigur il European Accessibility Act (EAA). Las regulaziuns da quel èn relevantas er per las interpresas svizras, sche talas furneschan products u servetschs en la UE.}

Question 14

Co poss jau testar AGOV?

Accepted Answer

Sin la pagina www.agov.ch/test stattan a Vossa disposiziun diversas paginas da test.

Question 15

È AGOV adina disponibel?

Accepted Answer

AGOV vegn manà d'ina organisaziun 7/24 en ils centers da computers da l'administraziun federala, e sia disponibladad vegn survegliada automaticamain. La plattafurma e la software èn concepidas per ina gronda resilienza. Eventuals disturbis vegnan adina eliminads uschè svelt sco pussaivel.

Question 16

Co è organisà il support dad AGOV?

Accepted Answer

Sin la pagina d'internet www.agov.ch/help chattan utilisadras ed utilisaders artitgels d'agid che pussibiliteschan da schliar in problem en moda autonoma en la plipart dals cas. Sche las utilisadras ed ils utilisaders na pon tuttina betg schliar il problem, sa drizzan els directamain al post cumpetent per l'applicaziun ch'els vulan utilisar. Quai po per exempel esser in'autoritad chantunala u in uffizi federal che ha per regla publitgà la pussaivladad d'entrar en contact sin la pagina d'internet da l'applicaziun correspundenta. Sco alternativa pon utilisadras ed utilisaders contactar ils responsabels sur la pagina d'internet www.agov.ch/help cun consultar l'artitgel d'agid correspundent e far là a la fin ina dumonda al support (self-service-ticket).

Question 17

Nua survegn jau agid en connex cun AGOV?

Accepted Answer

Sin www.agov.ch/help chattais Vus soluziuns per problems tipics. Là pudais Vus avrir in cas da support, al qual nus respundain uschè svelt sco pussaivel.

Question 18

Nua survegnan autoritads agid en connex cun AGOV?

Accepted Answer

Il support per las autoritads che participeschan vegn furnì dal support da segund nivel durant las uras da biro, e quai exclusivamain cun in ticket d'elavuraziun online. Per quest intent visitai la pagina d'internet www.agov.ch/help e cliccai sin l'artitgel d'assistenza correspundent; la creaziun d'in bigliet online cumenza a la fin da l'artitgel d'assistenza.

Question 19

Tge capita, schi perdel ils parameters d’access AGOV (facturs da login)?

Accepted Answer

Ils parameters d’access AGOV (facturs da login) pon vegnir restituids via il Self-Service. Las instrucziuns correspundentas èn chattablas sin www.agov.ch/help. Tenor la situaziun, il process po esser cumplex e pretender ina verificaziun d’identitad pussaivlamain cun custs.Per evitar quai, recumandain nus da registrar dus facturs da login: l’app AGOV access sin il smartphone ed ina clav da segirezza FIDO. Ulteriurs facturs pon vegnir registrads sut www.agov.ch/me.

Question 20

Pertgei in PIN dalla app ch’ei sin la darknet vegn consideraus buca problematic?

Accepted Answer

Era sch’il PIN da tia app figura sin ina glista da plaids-clav debols ni sgleitgs ch’ei sin la darknet, ei quei buca in ristg per la segirtad da l’app AGOV access.

Las raschuns:

l PIN protegia mo l’access local a l’app - e buca tia identitad digitala.
Era sch’ins enconuscha il PIN, drova el era tes smartphone sbloccau. Senza access al device, ei il PIN sulet nunutilisabel.
L’app sa protegia activmein cunter empruadas fallidas repetidas.
Suenter pliras entradas fallidas vegn l’access bloccaus ni l’app resetada. Aschia ei buca pusseivel da empruar blers PINs (bruteforcing).
Il PIN substituescha buca in’autenticaziun ferma.
L’app AGOV access utilisescha ulteriurs mecanissems da segirtad per s’annunziar tier survetschs online - sco certificats digitals ni autenticaziun cun dus facturs. Il PIN ei mo ina protecziun supplementara sil apparat.
Tiu smartphone porscha ulteriuras tiaras da segirtad.
Normalmein ei il device era protegì cun emprema digit, Face ID ni in code da l’apparat. L’app resta aschia segirada schizun sch’ins enconuscha il PIN.

Question 21

Per tgei basegn la app AGOV access in scumondarigl d’igl scherm sin miu smartphone?

Accepted Answer

Applicaziuns cun impurtanza segireivla, sco AGOV access, san mo vegnir duvradas sch’ei ha in scumondarigl (lock) sin il smartphone - sco per exempel in PIN, in model, in dett digital ni la reconschientscha faciala (Face ID). Quella pretensiun ha plirs motivs impurtonts per la segirtad.

D’ina vart protegi’la applicaziun datas persunalas e sensiblas - sco per exempel per banca electronica, sanadad, communicaziun d’e-mails, administraziun ni sistems d’interpresa. Sch’il apparat vegn piars ni engulads, san persunas nunautorisadas survegnir access als datums.

D’autra vart dovran applicaziuns modernas metodas d’autentificaziun ch’ein coligadas cun il scumondarigl - sco biometria (dett ni fatscha), ni clavs criptograficas. Quellas funcziunan mo sch’il lock ei activ.

Ultra da quei pretendan reglas legals ni administrativas ch’ina tala mesira da protecziun vegni dau - sco per exempel tier bancas (EU-directiva PSD2), sanadad (DSG, LDEP), ni administraziun publica (eGovernment) cun MDM.

Plinavon gida il lock da schurmetter cunter abusei sch’il apparat vegn piars. El impedescha access a las apps senza segirtad supplementara.

Perquei ei quei normal ed en biars cass era necessari ch’ils apps cun pretensiuns da segirtad mo funcziunan sch’il lock sin igl apparat ei activ. Aschia vegn protegiu igl access a Vossas datas.

Impurtont: L’app AGOV access metta buc automaticamein in lock sin il telefonin, mobein pretenda ch’ei vegni fatg.

Per plascher considerai: Ei ei Vossa responsabladad da tscharner in metod da bloccar ed a tener el uschia ch’el resta accessibel - per exempel cun arcunar el en moda segira ni documentar il code PIN duvraus. Il process da recuperaziun AGOV na sa buca restabilir l’access tier Vies smartphone sche Vus essas vegnìs excludi dad el.

Alternativa: Sche Vus vulis buc duvrar in lock sin Voss apparat, san ins era duvrar ina clav da segirtad FIDO2 per AGOV access.

Question 22

Per tgei che il mio smartphone (vegli) na funcziuna betg cun l'app AGOV access?

Accepted Answer

L'app AGOV access pretenda auts standards da segirezza dal apparat duvrà. Sche l'app na po betg vegnir installada u avierta sin in smartphone pli vegl u modifitgà, è quai per ordinari pervia d’in u plirs facturs relevants per la segirezza.In motiv frequent è che l’apparat è vegnì «rootà» (Android) u «jailbreakà» (iOS). Quai èn intervenziuns en il sistem operativ per survegnir access a zonas protegidas. Questas midadas dattan pli bler controlla, ma schliatan er mecanissems da segirezza basics. Il ristg ch’il malware vegn manà ora u che datas sensiblas vegnan enguladas crescha. Er apparats cun «Custom ROMs» u bootloader sbloccà valan sco periclitads. L'app AGOV access n’accetta betg quests apparats per raschuns da segirezza.Ina segunda raschun po esser che il chip da segirezza manca. Apparats moderns han cumpunents sco il «Secure Element», il «Trusted Platform Module (TPM)» u il «Trusted Execution Environment (TEE)». Sin apparats Apple fa quai la «Secure Enclave», sin Samsung savens «Knox». Quels èn indispensabels per apps criticas cun certificats d’apparat u FIDO2. Sch’ils mancan, na funcziuna betg l’app.Er versiun veglias dal sistem operativ pon esser problematicas. Android ed iOS senza updates da segirezza cuntegnan vulnerabilitads. Perquai pretenda l’app in sistem actual, anc sustegnì. Sche quai manca, na vegn l'app betg a startar.Cas specials èn variants nunconuschentas d’Android u distribuziuns spezialas. Er sche segiras, na vegnan ellas betg acceptadas sche betg sin la «whitelist». Sch’il sistem n’è betg vegnì approvà uffizialmain, na vegn l'app AGOV access betg a funcziunar.L'app pretenda er funcziuns activas sco in scumond da scherm (PIN, impressiun dal det u vischinanza), sco er la controlla da l’integritad dal sistem. Sche quels mancan, na pon ils standards da segirezza betg vegnir garantids.Resumaziun: L'app AGOV access funcziuna mo sin apparats betg modifitgads, actuals e segirs ch’èn sin la glista da cumpatibilitad. Quai protegia Vossas datas ed ils sistems.Sche Voss apparat n'è betg cumpatibel, pudais Vus alternativamain utilisar ina clav da segirezza FIDO2.

Question 23

Tge connex ha AGOV cun il CH-LOGIN da l'administraziun federala?

Accepted Answer

AGOV e CH-LOGIN vegnan duvrads actualmain en il manaschi parallel. Il CH-LOGIN stat mo a disposiziun per il e-government da l'administraziun federala, entant che AGOV po vegnir applitgà da tut las autoritads svizras. Il CH-LOGIN vegn remplazzà cumplettamain tras AGOV uschè svelt sco pussaivel. Gia oz po vegnir midà per tut las applicaziuns da CH-LOGIN sin AGOV.

Question 24

Tge connex ha AGOV cun la e-ID statala planisada?

Accepted Answer

La e-ID statala svizra vegnan ins a pudair utilisar directamain en AGOV sco factur da login, uschia che l'app AGOV access (e la clav da segirezza) daventa obsoleta per las utilisadras ed ils utilisaders da la e-ID. L'annunzia ad AGOV cun l'app AGOV Access u cun ina clav da segirezza resta vinavant disponibla sco alternativa. Uschia han ils utilisaders la libertad da tscherner sche els vulan utilisar l'e-ID, l'app AGOV Access u la clav da segirezza sco factor d'annunzia. AGOV vegn er a sustegnair da colliar contos dad AGOV existents cun la nova e-ID (n:1). La e-ID porta per AGOV e per las applicaziuns da destinaziun respectivas la plivalur, che l’identitad effectiva da las utilisadras finalas e dals utilisaders finals è confermada en moda fidabla, senza ch'ellas ed els stoppian percurrer en AGOV ina procedura per controllar l'identitad sco p.ex. l'identificaziun cun video.

Question 25

Tge signifitga l'acronim «AGOV»?

Accepted Answer

Per il servetsch d'autentificaziun da las autoritads svizras han ins tschertgà in num curt, ch'è facil da pronunziar e ch'ins po duvrar – senza translaziun – en tut las linguas naziunalas sco er en englais, e ch'era disponibel en Svizra sco proprietad intellectuala.

L'acronim «AGOV» sa cumpona da las noziuns «autentificaziun» e «government». El vegn pronunzià sco quai ch'el vegn scrit: /ˈa.ɡɔv/

Question 26

Tge fund ha il maletg resp. l'identitad visuala dad AGOV?

Accepted Answer

L'identitad visuala dad AGOV sa basa sin ina paletta da colurs deducida da l'Administraziun digitala Svizra (ADS). La finamira è quella, da desister sapientivamain da colurs dals chantuns u da la Confederaziun svizra – perquai ch'il fluss dal login sur AGOV resorta da differentas autoritads e maina er puspè enavos tar quellas.Il logo da AGOV sviluppa ils quadrats dal logo da ADS en ina furma extendida che simbolisescha il manico d’üna clav.La concepziun dad AGOV è orientada a la buna utilisabladad ed a l'accessibilitad senza barrieras: Ella porscha cuntrasts optimals, in maletg adattà a tut las grondezzas da moniturs ed ina structura dals cuntegns ch'è optimada per meds auxiliars sco screenreaders.

Question 27

Co vegnan elavuradas las datas da las recensiuns tar l'app AGOV access?

Accepted Answer

Per l'elavuraziun da las recensiuns n'è betg responsabla la Confederaziun svizra, mabain ils purschiders da las plattafurmas respectivas – p.ex. Google ed Apple. Valair valan las cundiziuns d'utilisaziun respectivas da quests purschiders. La Confederaziun svizra n'elavura betg sezza las recensiuns. Dumondas e propostas davart l'app AGOV access pon vegnir inoltradas sur il formular da support sin www.agov.ch/help.Il dumber da las recensiuns ch'entran è fitg pitschen (en la dimensiun da promils da las utilisadras e dals utilisaders dad AGOV). Cuntrari a bleras autras apps, na dumonda l'app AGOV access numnadamain mai da far ina valitaziun. Las recensiuns vegnan mo fatgas sin atgna iniziativa da las utilisadras e dals utilisaders sur la plattafurma respectiva.

Dumondas & respostas